MOwambo omuna oiimati yomaludi nomaludi, hai hangika peenhele da yoloka, nohai ya pomafimbo omudo ayooloka. Odula ohai etelele oiimati ngaashi, Eembe, Omado, Eengongo, oshoyo Eenhapa. Oiimati ei ohai kufa ounona ondjala ngeenge ve li koufita ile tava di keefikola. Eembu nEeshe oha di hangika yoo ko itopolwa yo ko Kavango na Zambezi. Eembu oha di ifanwa melaka lo shi Subia Mubbu, doo Eeshe oha di ifanwa Mumaka.
Efimbo lokwenye ohali etelele yoo oiimati ngaashi, eeshe, eemwiyu, neenyandi, oku tumbula po ashike imwe. Eeshe odi li pamaludi eli anhe. Ope na Eeshe ile Eeshelele dinini ditilyana, edi odi hole unene oku mena pedu lomufitu, ope na yoo Eehonga, ha dikala unene koitunhu, poo ope na Epapashe, edi odakula ku dikwao, no hadi kala di li kumwe. Ope na yoo Omawila, edi ohadi monika ditoka moluvala ngeenge ditalala, kakele ngeenge da kukuta ohadi tilyana moluvala.
Eeshe kakele kokuliwa kwahawiishu, ohai dulu yoo oku telekwa okatete ile oku ningwa ombike. Ngeenge ta ku ningwa okatete, eeshe ohadi tuwa koshini, ombudu yado tai tulwa momeva, ndele omeva taa dindwa nawa-nawa. Konima eshi omeva a dindwa, omeva ohaa tulwa mombiya, ndele tamu tulwa okafila komahangu, nomongwa. Etete ile okatete oha ka pilulwa, opo ka ha ninge eenhiti. Eeshe odi nyenye oku dja keshito, onghee mokatete iha mu pumbwa oku tulwa oshuuka.